اليوم حبيت نهدر على واش راهو يصرا في وقتنا ضورك
واش هاذو الحجابات اللي راهم يديروهم الناس ووعلاش؟

اطرقت لهاذ الفكرة على خاطر صرا مشكل عندنا مع وحدة غريبة يعني دراتها لقريبة ليا
كانت معاونة هاذي الطفلة فوق اللازم خدمتها عندها وعلمتها امور بزاف ماكانتش تعرفهم
وداصرتها ودارتها كيما اختها وأعز وخلاتها تتحكم وكلي هي مولات الشي غير باش ماتحسسهاش انو راهي تحكم فيها ولا تتكبر عليها وهاذو الأمور وغيرها

شعال من مرة يصراو مشاكل بيناتهم صغار ولا حتى كبار بصح تعالج المشكل وتتجاهلهم على خاطر هي دايما نية وتحب ترضي اللي قدامها بالحسنى
وتقول ماعليش نفوتها ومانربحش العيب

بصح الطفلة من المداصرة بزاف
انا ماعرفتش العقلية كيفاه تعاون شخص ويرجع يدور عليك لأتفه الأسباب
اتناقرو مرة على خاطر قوات عليها وبغات تخرجها
بصح امها غاضتها وقالتلها في وجهي رديها

املا رجعتها وتفاهمو باش يبقاو في حدود ورضات بصح الطفلة في قلبها حاجة اخرى

الطفلة هي وامها واختها تفاهمو عليها وراحو عند الطالب كيما يقولو
وعملولها حجابات
مع انهم كانو دايما يبينو رواحهم بلي ناس ملاح ويتبعو الدين
بصح في الاخير جازت ليام وبانو على حقيقتهم
تشوكينا كي لقينا هاذو الججابات في الخدمة

ومكتوب عليها اسمها بلي لازم دايما ترفدهم معاها وحطتهملها في الخدمة
احنا احرقناهم وكي عاودت جات سقساتها عليهم
قالتلها هاذو دارتهم ماما واختي لروحي ماشي ليك
وهذا كامل علاجال خافو باه تعاود تخرجها
وكشفت فان بلي اختها هاذي كبيرة وماهيش مزوجة املا اعياو والتجؤو للسحارين
وكشفت بلي دايما يديرو امور كيما هاذو الحجابات والعياذ بالله
وقالت بلي هذا شي نورمال ماعليه والو.........؟؟؟؟؟؟؟ ؟؟؟؟؟

من هاذي الحكاية
اكيد كاين قصص اخرى بزاف اللي يعملو حجابات كيما هاذو
كيما قلت
اللي تخاف ماتتزوجش تديرهم
واللي تحب تطيح واحد تديرهم
واللي يحب ينكس على خطبة وحدة ولا واحد يديروهم
واللي يغير من واحد يديرهم
واكيد كلهم نسا جهال اللي يوصلو لهاذ التفكير
ومانيش نهدر على السحور اللي يديروه في الاكل ولا عند الباب ولا غيرو
هذاك فان وحدو........ خلي برك

وعلاش هاذ الشي كامل
هذا كامل شرك بالله وعلاش مكانش ربي والعياذ بالله يشكولو همومهم
مكاش ربي هو اللي لازم يلتجأو ليه ويدعوه

صحة ونزيد نسقسي
واش هاذو الأمور اللي راهم يكتبو فيهم السحرة وواش هاذو الرموز في اللي يسموهم حجابات
والله غير شي يحير

تصيبوهم هكذا في هاذو الاشياء:

وهاذو الأوراق واش راه مكتوب فيهم يا عجبا؟؟.....


سبحان الله
والله غير يحيرو
واش هاذ الجهل ؟
وواش هاذ الوقاحة ؟
قال رسول الله صلى الله عليه وسلم:( احفظ الله يحفظك ، احفظ الله تجده تجاهك ، إذا سأَلت فاسأَل الله ، وإذا استعنت فاستعن بالله ، واعلم أن الأُمة لو اجتمعت على أَن ينفعـوك بشيء ، لم ينفعوك إلا بشيء قد كتبه الله لك ، وإن اجتمعوا على أن يضروك بشيء ، لم يضروك إلا بشيء قد كتبه الله عليك، رفعت الأقلام وجفت الصحف )

قويت عليكم
ان شاء الله يعجبكم الموضوع
واكيد كل واحد فيكم عاش وقائع كيما هاذو
اللي يحب يحكي للفائدة يتفضل

وشكرا ليكم
تحياتي الخالصة